Gen 26 | ZomZIV | STEP | Abraham hun lai-a kialpi masa banah - tu-in gam sungah kialpi tunga - Gerar a Philistia kumpipa Abimelech kiangah Isaac pai hi.

Genesis 26

Isaac le Abimelech

1 Abraham hun lai-a kialpi masa banah - tu-in gam sungah kialpi tunga - Gerar a Philistia kumpipa Abimelech kiangah Isaac pai hi. 2 Isaac tungah TOPA kilanga, “Egypt ah paisuk kei in; na ten nadinga kong genna gamah teng in. 3 Hih gamah tawmvei sung teng in; nang tawh omkhawm in thupha kong pia ding hi. Ahang in nang le na suan le khakte tungah hih gamte hong pia-in na pa Abraham tungah tomlo a ka ciamna ka kipsak ding hi. 4 Na suan-le-khak ^{▼▼26.4 Ahikeh ci} te vana aksi zahin ka tamsak dinga, amaute hih gam khempeuh pia-in, na suan-le-khak tungtawnin leitunga minamte thupha ka pia ding hi; 5 bang hang hiam cih leh Abraham in ka thu hong mangin, ka sawlna, ka thupiakna, ka thukip le ka thukhamte mang hi,” ci hi. 6 Tua ahi ciangin Gerar ah Isaac teng hi. ^b

7 Tua muna mite in a zi thu amah a dot uh ciangin, “Amah ka sanggamnu ahi hi,” ci hi. Bang hang hiam cih leh, “Amah ka zi hi,” a cih ding lau hi. Amah in, “Hih muna mite in Rebekah melhoih ahi manin ama hangin kei hong that kha ding uh hi,” ci-in ngaihsun hi.

8 Tua lai-ah Isaac sawtveipi a om khit ciangin Philistia-te’ kumpi Abimelech in tawlet panin ensuk a, Isaac in Rebekah a noh laitak a mu hi. 9 Tua ciangin Abimelech in Isaac samsak a, “Amah na zi taktak hi lo hiam! Bang dinga, ‘Ka sanggamnu hi,’ ci na hi hiam?” ci hi.

Isaac in, “Ama hangin ken sih lawh kha leng, ci-a ka kingaihsut hang ahi hi,” ci-in dawng hi.

10 Tua ciangin Abimelech in, “Ko tungah bang hong hih na hi hiam? Mite khatpeuh in na zi luppih man leh kote hong siattut na suak ding hi,” a ci hi. ^c

11 Tua ciangin Abimelech in mi khempeuh thu pia a, “Hih mipa ahikeh a zi a khoihkha peuhmah kithat ding hi,” a ci hi. ^d

12 Isaac in tua leitangah khaici tuh a, TOPA in thupha pia ahi manin a zah za khat at hi. 13 Tua mipa hau a, mihau mahmah a suah dong a hauhna a kizom den hi. 14 Amah in tuuhonte le bawnghonte le nasemte tampi nei ahi manin Philistia-te in amah haza uh hi. 15 Tua ciangin a pa Abraham hun lai-a a pa’ nasemte in a tawh uh tuikhukte khempeuh, Philistia-te in hucip in lei vuk uh hi. ^e

16 Tua ciangin Abimelech in Isaac kiangah, “Ko kiang panin paikhia in; ko adingin na vanglian lua hi,” a ci hi. ^f

17 Tua ciangin tua mun panin Isaac kikhinkhia a, Gerar Kuamah giahphual satin tua lai-ah teng hi. 18 Isaac in a pa hun lai-a kitosa tuikhukte, Abraham sih khit cianga Philistia-te in a hukcipte uh hong kika, a pa min phuahsate mah a phuak hi.

19 Isaac nasemte in tua kuam ah to uh a tuisiang khuk khat a mu uh hi. 20 Ahi hangin Gerar gancingte in Isaac gancingte tawng uh a, “Tua tui ko aa ahi hi!” ci uh hi. Tua ciangin amaute amah tawh kitawng uh ahi manin tuikhuk min Esek ^{▼▼26.20 Esek pen kitawng cihna} phuak hi. 21 Tua ciangin tuikhuk dang khat to kik uh a, tua hangin zong kitawng uh ahi manin Sitnah ^{▼▼26.21 Sitnah pen kilangneihna cihna} min phuak hi. 22 Tua lai panin kikhinkhia in tuikhuk dang khat to uh a kuamah in a tawng nawn kei hi. Amah in, “Tu-in TOPA in mun hong pia khin hi, hih gamah i pung ding hi,” a cihna in Rehoboth ^{▼▼26.22 Rehoboth pen mun cihna} phuak hi. ^j

23 Tua lai panin Beersheba ah amah paito hi. 24 Tua zanin ama kiangah TOPA kilanga, “Kei in na pa Abraham’ Pasian ka hi hi. Lau kei in nang tawh ka om khawm hi; ka nasempa Abraham hangin nang thupha kong pia dinga, na suan-le-khakte ka pungsak ding hi,” ci hi.

25 Isaac in tua lai-ah biakna-tau khat dawha TOPA kiangah thu a ngen hi. Tua lai-ah a puanbuk lama, a nasemte in tuikhuk khat to uh hi.

26 Tua hun laitakin Gerar panin Abimelech, ama thudotpa Ahuzzath le a galkap mangpa Phicol tawh ama kiangah va pai uh hi. 27 Isaac in amaute kiangah, “Note in kei hong hua-in hong hawlkhia napi bang hanga kei kiangah hong hawh na hi uh hiam?” ci-in dong hi. ^k

28 Amaute in, “Kote in, nang tawh TOPA a om lam teltakin ka mu uh hi; tua ahi manin kote in, ‘’Eite kikal - nang le ko kikalah thukima kiciamna khat i neih ding kisam hi,’ ka ci uh hi. 29 Kote in no hong khoihkha het loin limtakin hong bawla, lungnuamtakin kong paikhiatsak bang tektek un, ka natna ding uh bangmah nong hih loh nadingin nang tawh thukimna i bawl ding hi. Tu-in TOPA in nang thupha hong pia zo hi,” ci-in dawng hi. ^l

30 Tua ciangin Isaac in amau ading pawi khat bawla, amaute in a ne a dawn uh hi. 31 A zingciang zingtungin tua mite tomlo in a kiciam thuk uh hi. Tua ciangin Isaac in amaute khakhia-a, amaute in amah lungnuamtakin a nusia uh hi. ^m

32 Tua ni-in Isaac nasemte pai-in amau tawhsa tuikhuk thu amah a ko uh hi. Amaute in, “Tui ka mu ta uh hi,” ci uh hi. 33 Amah in a min Shibah ^{▼▼26.33 Shibah pen kiciamna ahikeh sagih cihna hi thei} phuaka, tuni dong tua khuapi min Beersheba ^{▼▼26.33 Bersheba pen kiciamna tuikhuk ahikeh tuikhuk sagih cihna hi thei hi.} hi lai hi. ^p

34 Esau kum sawmli a phak ciangin Hit mi Beeri’ tanu Judith tawh kitenga, Hit mi Elon tanu Basemath tawh zong a kiteng hi. 35 Amaute Isaac le Rebekah lungkhamna nak ahi uh hi. ^q